အဆင်းတန်းဆာ၊ ဆင်ရာအပြား၊ ၁၄-ပါး၊ ကျမ်းများမည်သို့မိန့်သနည်း? ။ ။
စိန္တကျော်သူ ဦးသြရေး သြ၀ါဒထူးပျို့၌ ဤသို့မိန့်၏။
တစ်ဆယ့်လေးဖြာ၊ ဆင်းတန်းဆာကား
(၁) ရာဇာဘုန်းရှိ၊ ပြည်လုံးမိကို၊ နီတိကျမ်းလျှင်၊ တန်းဆာဆင်၏၊
(၂) ဂုဏ်အင်အထူး၊ ကျေးဇူးရှိသူ၊ ထိုထိုလူကို၊ မမြူဒေါသ၊ မာန်မထဘဲ၊ နှိမ့်ချခြင်းလျှင်၊ တန်ဆာဆင်၏၊
(၃) ရုပ်သွင်ပျိုထွား၊ မိန်းမအားမူ၊ တည်ငြားစောင့်ရှောက်၊ ယွင်းမဖေါက်ဘဲ၊ ရှက်ကြောက်ခြင်းလျှင်၊ တန်းဆာဆင်၏၊
(၄) လင်နှင့်မယား၊ သူတို့အားမူ၊ မုန်းထားမလို၊ ချစ်ကြည်ညို၍၊ လူဗိုလ်တကာ၊ ရိုသေရာသည်၊ သစ္စာခိုင်ကျည်၊ တည်ကြည်ခြင်းလျှင်၊ တန်းဆာဆင်၏၊
(၅) ၀န်းကျင်သာကျယ်၊ အိမ်မှာဝယ်ကား၊ သူငယ်သာလျှင်၊ တန်းဆာဆင်၏၊
(၆) ကျယ်မြင်နှံ့သိ၊ ပညာရှိမူ၊ က၀ိပျူငှာ၊ ဆန်းဂါထာနှင့်၊ ကဗျာသံချို၊ ဖွဲ့ဆိုခြင်းလျှင်၊ တန်းဆာဆင်၏၊
(၇) နှုတ်မင်္ဂလာ၊ စကားမှာကား၊ အသာအချို၊ သူနာလိုအောင်၊ မိန့်ဆိုခြင်းလျှင်၊ တန်ဆာဆင်၏၊
(၈) သန့်စင်ကြည်ဖြူ၊ ကိုယ်ကိုမူကား၊ ဆန်မြူခြမ်းမျှ၊ ဒေါသမသင့်၊ အကျင့်သီတင်း၊ ကောင်းခြင်း
သည်လျှင်၊ တန်းဆာဆင်၏၊
(၉) ယွယ်အင်လွန်သူ၊ မိန်းမမူကား၊ မူယူဆိတ်ငြိမ်၊ မွေ့သိမ်ခြင်းလျှင်၊ တန်ဆာဆင်၏၊
(၁၀) ပျော်ရွှင်စလို၊ နှလုံးကိုမူ၊ ကုသိုလ်ကောင်းမှု၊ မကောင်းမှုဟု၊ နှစ်ခုရောရာ၊ အာသာစုံမက်၊ နှစ်သက်မူးမော်၊ မွေ့လျော်ခြင်းလျှင်၊ တန်ဆာဆင်၏၊
(၁၁) ကိုယ်အင်မချို့၊ ရဟန်းတို့မူ၊ နောင်ဖို့ရွယ်ရည်း၊ သည်းညည်းခံချုပ်၊ ကြည်ဖွယ်လုပ်သား၊ သာရုပ္ပလျှင်၊ တန်းဆာဆင်၏၊
(၁၂) အားအင်ထက်မြန်၊ စွမ်းသန်သသူ၊ ထိုထိုလူကို၊ မယူရန်တုံ့၊ မလှုံ့ရန်ကင်း၊ သည်းခံခြင်းနှင့်၊ မပျင်းကြိုးကုတ်၊ အားစုတ်စုတ်တိ၊ တုပ်ဝပ်ခြင်းလျှင်၊ တန်းဆာဆင်၏၊
(၁၃) လူတွင်အိမ်ယာ၊ ထောင်သူမှာကား၊ ဥစ္စာ ရွှေငွေ၊ ဆန်ရေ စပါး၊ ကျွဲနွားကျွန်ကျေး၊ သားမြေးကုံလုံ၊ပြည့်စုံခြင်းလျှင်၊တန်းဆာဆင်၏၊
(၁၄) ကျယ်မြင်ပညာ၊ သူကောင်းမှာကား၊ ပါယ်ရွာကြောက်ရှက်၊ ရမ္မက်ဆွံ့ရှား၊ စကားမယွင်း၊ မှန်ခြင်းသည်လျှင်၊ တန်းဆာဆင်သည် ... လူတွင် နိမ့်မြင့် သို့မှတင့်။
အဆင်းလှရာ၊ ကြောင်း ၃-ဖြာ၊ လောင်းလျာအသို့ ကျင့်သနည်း။ ။ အလောင်းတော်မြတ် တေမိယဇာတ်၌ ကျင့်ပုံကား -
(၁) အတီတံ နာနုသောစာမိ - လွန်ပြီးအမှု ဒုစရိုက်စု ကိုလည်း မတွေးတောမစိုးရိမ်၊
(၂) နာနုသောစာမိ နာဂတံ - နောင်ခါစားဝတ်နေရေးကိုလည်း မတွေးဆ မပူပန်၊
(၃) ပစ္စုပ္ပန္နေန ယာပေမိ - မျက်မှောက်ကျပန်းဖြင့်သာ မကောင်းမှုရှောင်လွှဲကာ ချမ်းသာစွာရောင့်ရဲခဲ့၏၊ တေန ၀ဏ္ဏော ပသိဒတိ - ဒါကြောင့် ငါ့ရုပ်ဆင်းဝါ လွန်စွာ ကြည်လင်လှပ၏။
အဆောင်ရမိဖုရား ၄-ပါး။ ။ မြန်မာဘုရင်များ၏ မိဖုရားမျိုးရှစ်ပါးထဲတွင် အဆောင်ပိုင်ရသောမိဖုရားများမှာ
(၁) မြောက်ဆောင်တော်မိဖုရား၊
(၂) တောင်ဆောင်တော်မိဖုရား၊
(၃) မြောက် ရွှေရေးဆောင်တော်မိဖုရား၊
(၄) တောင် ရွှေရေးဆောင်တော် မိဖုရား။
အဇ္ဈာသယကြီး ၆-ပါး။ ။ ဘုရားလောင်းတို့ အလိုတော်မြတ်ကြီး ၆-ပါး၊ ဤ ၆-ပါးနှင့်ပြည့်စုံမှ ဘုရားအဖြစ်ကို ရယူနိုင်သည်၊ စရိယာပိဋက အဋ္ဌကထာ ၈၂၈-၌အကျယ်ရှု။
(၁) နေက္ခမဇ္ဈာသယ - တောထွက်လိုခြင်း၊
(၂) ပ၀ိဝေကဇ္ဈာသယ - အဖေါ်မမှီး တစ်ယောက်တည်းသာ ဆိတ်ငြိမ်ရာ၌နေလိုခြင်း၊
(၃) အလောဘဇ္ဈာသယ- လောဘမရှိခြင်းကိုလိုခြင်း၊
(၄) အဒေါသဇ္ဈာသယ - ဒေါသမရှိခြင်းကိုလိုခြင်း၊
(၅) အမောဟဇ္ဈသယ -မောဟမရှိခြင်းကို လိုခြင်း၊
(၆) နိဿရဏဇ္ဈာသယ - ဘုံသုံးပါးမှ လွတ်ကင်းလိုခြင်း။
အဇိဏ္ဏ လေမျိုး ၁၂-ပါး။ ။ ၀မ်းကိုဒုက္ခပေးတတ်သောလေများ၊
၎င်းင်းအဖြေ (လေမျိုး ၈၀ « ခ» ပိုဒ်)၌ ရှုပါလေ။
အဉ္စလီ ၅-သွယ်၊ သိမှတ်ဖွယ်၊ ကျမ်းဝယ်မည်သို့ရှိသနည်း?။ ။ ၀ိနည်းပိဋကတော် ပရိဝါကျမ်းမြတ်၌ ဤသို့လာရှိ၏၊
(၁) ဖျင် ပုဆိုး တဘက် ပ၀ါကို လက်ကန်တော့တင်ခြင်း၊
(၂) လက်အုပ်ချီမိုးခြင်း ရှိခိုးခြင်း၊
(၃) လက်ဖ၀ါး နှစ်ဘက်တို့ဖြင့် ကြီးမြတ်သူ၏ခြေကိုကိုင်တွယ်ခြင်း၊
(၄)ချစ်ခင်သော မေတ္တာ ရှေ့သွားရှိခြင်း၊
(၅) ရိုသေလေးမြတ်သော စိတ်ထားရှိခြင်း။
No comments:
Post a Comment