အာ၊ အား-အာကာသ ၄-မျိုး။ မှ အားတော် ၁၀-ပါး၊

အာကာသ ၄-မျိုး။ ။ ရေးခြစ်လို့မရသော ကောင်းကင် လေးမျိုး။ (အင်္ကုရဋီကာ။)
(၁) အဇဋာ ကာသ- ယခု မျက်မြင်ဖြစ်သော ဟင်းလင်းကောင်းကင်။
(၂) ပရိစ္ဆိန္နာ ကာသ- တံခါးပေါက် တိုက်နံရံပေါက် အိုးမျက်နှာဝပေါက် စသည် ပိုင်းခြားကာရံအပ်သောအပေါက်ဟူသမျှ။
(၃) ကသိဏုဂ္ဃပါဋိ မာကာသ- အာကာသာနဉ္စယတန ဈာန်၌လာလတ္တံ့သော ကသိုဏ်း ၉-ပါးတွင် တစ်ပါးပါးကို ခွါချ၍ ရအပ်သော ကောင်းကင်ပညတ်။
(၄) ပရိစ္ဆေဒါ ကာသ- ပရိစ္ဆေဒရုပ်ခေါ် အာကာသဓါတ်။


အာဃာတ၀တ္ထု ၉-ပါး ၁၀-ပါး ၂-နည်း။ ။ ဓမ္မသင်္ဂဏီပါဠိတော် ၂၁၆။ ဋ္ဌ။ ၃၉၉။ ၀ိဘင်းပါဠိတော်။ ၄၀၃-၄၀၅။ ဋ္ဌ။ ၄၉၄-၄၉၅ တို့၌ အကျယ်ရှုပါ။ ၎င်းင်းသရုပ်ကို (ရန်ငြိုးဖွဲ့ကြောင်းတရား ၁၀-ပါး)၌ ပြအံ့။

အာစရိယမျိုး ၅-ပါး။ ။ ၀ိနည်းပရိဝါပါဠိတော် ၃၅၈။ ၎င်းင်း။ ဋ္ဌ။ ၂၂၄။
(၁) ပဗ္ဗဇ္ဇာစရိယ၊
(၂) ဥပသမ္ပဒါစရိယ၊
(၃) နိဿယာစရိယ၊
(၄) ဥဒ္ဒေသာစရိယ- စာသင်ပေးသူ၊
(၅) သြ၀ါဒါစရိယ။

အာစရိယ ဂုဏ်အင်္ဂါ ၂၅-ပါး။ ။ ၎င်းင်းအဖြေကို (ဆရာ့ဂုဏ်အင်္ဂါ ၂၅-ပါး)၌ ကြည့်ပါ။

အာစောက်ရပ်မှာ ဖြစ်ပေါ်လာ၊ မြန်မာအက္ခရာမျိုး ၈-လုံး။ ။ ၎င်းင်းအဖြေ (တာလုဇ အက္ခရာ ၈-လုံး) မှာ ကြည့်ပါ။

အာဇာနည် ဗိမာန်ရှင်ကြီး ၉-ယောက်။ ။အာဇာနည် ဗိမာန်ရှင်ကြီး ၉-ယောက် ။ ။ မြန်မာ့လွတ်လပ်ရေးဖခင်ကြီး ဗိုလ်ချုပ်အောင်ဆန်းနှင့်
ပေါင်း ကိုးယောက်သော အလောင်းများထားရှိရာ ရန်ကုန်မြို့ အာဇာနည်ဗိမာန်ကြီး၌ရှိသည်။
www.wikimyanmar.co.cc
http://www.news-eleven.com/index.php?option=com_content&view=article&id=3827:2010-07-18-03-26-08&catid=78:2009-11-13-06-25-17&Itemid=135
(၁) ဗိုလ်ချုပ်အောင်ဆန်း၊ နတ်မောက်မြို့ ဦးဖာ-ဒေါ်စုတို့မှ ၁၉၁၅-ခုနှစ် မွေး၊ ၁၉၄၇-ခုနှစ်
ဇူလိုင်လ ၁၉-ရက်နေ့၌ ကျဆုံး။
http://www.aungsan.com/, http://en.wikipedia.org/wiki/Aung_San
(၂) သခင်မြ၊ ပြည်ခရိုင် ထုံးဘိုမြို့ ဦးဘိုးချွန်- ဒေါ်သက်လယ်တုိ့မှ ၁၈၉၇-ခုနှစ်မွေး၊ ၁၉၄၇- ကျဆုံး။
http://wikimyanmar.co.cc/wiki/index.php?title=သခင်မြ
(၃) မိုင်းပွန်စော်ဘွား စ၀်စံထွန်း၊ မိုင်းပွန် စော်ဘွားကြီး စ၀်ခွန်ထီးနှင့် မဟာဒေ၀ီ နန်းစိန်ဥတို့မှ
၁၉၀၇-ခုနှစ်မွေး၊ ၁၉၄၇-ခုနှစ် ကျဆုံး။
http://www.scribd.com/doc/4847421/Main-pon-saw-bwar-sat-san-tun-
(၄) ဒီးဒုတ် ဦးဘချို၊ မြောင်းမြမြို့ ဦးဘိုးစာ ဒေါ်မြစ်တို့မှ ၁၈၉၃-ခုနှစ် မွေး၊ ၁၉၄၇-ခုနှစ် ကျဆုံး။
http://wikimyanmar.co.cc/wiki/index.php?title=ဒီးဒုတ်ဦးဘချို
(၅) ဦးရာဇတ်၊ မိတ်္ထီလာမြို့ မစ္စတာ အေရာမန်- ဒေါ်ငြိမ်းလှတို့မှ ၁၈၉၈-ခုနှစ်မွေး၊ ၁၉၄၇-
ခုနှစ် ကျဆုံး။ http://en.wikipedia.org/wiki/U_Razak
(၆) မန်းဘခိုင်၊ ဟင်္သာတမြို့နယ် ယုန်သလင်းရွာ မန်းပေကုန်း ဒေါ်ပုတို့မှ ၁၉၀၃-ခုနှစ်မွေး၊
၁၉၄၇-ခုနှစ် ကျဆုံး။
http://www.karenunited.co.cc/2009/07/blog-post_2996.html
(၇) ဦးဘ၀င်း၊ နတ်မောက်မြို့ ဦးဖာ-ဒေါ်စုတို့မှ ၁၉၀၁-ခုနှစ်မွေး၊ ၁၉၄၇-ခုနှစ် ကျဆုံး။
http://en.wikipedia.org/wiki/Ba_Win
(၈) ဦးအုန်းမောင်၊ မင်းဘူးမြို့ မစ္စတာ အိပ် (ခ်ျ) ဒဗလျူ ထရပ်(တ်) ၀ိန် - ဒေါ်ရွှေမြင့်တို့မှ
၁၉၁၃-ခုနှစ်မွေး၊ ၁၉၄၇-နှစ် ကျဆုံး။ 
http://wikimyanmar.co.cc/wiki/index.php?title=ဦးအုန်းမောင်
(၉) သက်တော်စောင့် ရဲဘော်ကိုထွေး၊ မန္တလေးမြို့ တောင်ပြင်သိပ္ပံရပ် ဦးကိုကိုလေး- ဒေါ်မင်ရီတို့မှ
၁၉၂၉-ခုနှစ်မွေး၍ ၁၉၄၇-ခုနှစ်၌ ကျဆုံးရသည်။


အာဇာနည်များ၊ မျိုး ၆-ပါး။ ။ ဒုကင်္ဂုတ္တရ။ ပါ။ ၇၆။ ဋ္ဌ။ ၅၁။ စတုကဂုင်္တ္တရ။ ဋ္ဌ။ ၂၉၂-တို့၌ အကျယ်ရှုပါ။ မကြောက်မရွံ့ မတွန့်မဆုတ်ဘဲ ကြောင်းကျိုးဟုတ်မှန်ကို ဝေဖန်တတ်သော ပုဂ္ဂိုလ်သတ္တ၀ါ ၆-မျိုး၊
(၁) သီဟ- ခြင်္သေ့ အာဇာနည်မျိုး၊
(၂) ဟတ္ထာဇာနေယျ- ဆင် အာဇာနည်မျိုး၊
(၃) အဿာဇာနေယျ-မြင်း အာဇာနည်မျိုး၊
(၄) ဥသဘာဇာနေယျ- နွားလား အာဇာနည်မျိုး၊
(၅) ပုရိသာ ဇာနေယျ- ယောက်ျားအာဇာနည်မျိုး၊
(၆) ခီဏာသ၀- ရဟန္တာပုဂ္ဂိုလ်။
မှတ်ချက်။ ။ နံပါတ် ၆၊ ရဟန္တာပုဂ္ဂိုလ်တို့သည် ကိလေသာကင်းစင်သောကြောင့် မရွံ့မကြောက် ရဲရင့်ကြ၏၊ကျန် ၅-ယောက်တို့အား အတ္တဒိဋ္ဌိ သက္ကာယဒိဋ္ဌိလွန်ကဲ အားကြီးသောကြောင့် ကြောက်ရွံ့ခြင်းကင်းကြကုန်၏ဟုမှတ်ရာသည်။

အာဇီဝဋ္ဌမက သီလ။ ။ ပဋိသမ္ဘိဒါမဂ်။ ပါ။ ၄၀။ ဋ္ဌ။ ပ-အုပ် ၁၅၁။ သုတ္တနိပါတ်။ ဋ္ဌ။ ဒု-အုပ်။ ၁၁၁။ ၀ိသုဒ္ဓိမဂ် ပ-အုပ် ၁၂။ သုတ် သီလက္ခန်။ ဋ္ဌ။ ၂၈၁- တို့၌ အကျယ်ရှု။ အာဇီဝလျှင် ရှစ်ခုမြောက်သော သီလဟူ၏၊
(က) ကာယဒုစရိုက် ၃-ပါး၊
(ခ) ၀စီဒုစရိုက် ၄-ပါး၊
(ဂ) မိစ္ဆာဇီဝ ၁-ပါး၊ ၎င်းင်းရှစ်ပါးကို ရှောင်ကြဉ်စောင့်ထိန်းမှုသီလကို ဆိုသည်၊ ကာယဒုစရိုက်၌- (အဗြဟ္မာစရိယာ)ကို ယူ။

အာနန္ဒာထေရ်၊ ဘွဲ့ ၅-ထွေ၊ ရလေ ဧတဒဂ်။ ။ ၎င်းင်းသရုပ် (ရှင်အာနန္ဒာ၊ ဘွဲ့ပုံသာ၊ ၅-ဖြာ ဧတဒဂ်)၌ ရှုပါလေ။

အာပတ် ၇-ပုံ။ ။ ရဟန်းတော်များအတွက် ၀ိနည်းပညတ်ချက်လာ အခြေခံဥပဒေကြီး ၇-မျိုး။
(၁) ပါရာဇိက၊
(၂) သံဃာဒိသိသ်၊
(၃) ထုလ္လစဉ်း၊
(၄) ပါစိတ်၊
(၅) ပါဋိဒေသနီ၊
(၆) ဒုက္ကဋ်၊
(၇) ဒုဗ္ဘာသီ။

အာပတ်မသင့်သောပုဂ္ဂိုလ် ၂-ယောက်။ ။ ပရိဝါပါဠိတော် ၁၅၈။ ဋ္ဌ။ ၂၁၄။ ဒွေ ပုဂ္ဂလာ အနာပတ္တိဟူသောဝိနည်းတော်လာအတိုင်း။
(၁) မဟာမုနိ ရာဇာ- ရဟန်း မင်းမြတ်ဖြစ်တော်မူသော ဘုရားသခင်၊
(၂) ပစ္စေကဗုဒ္ဓါ- ဘုရားငယ်ဖြစ်တော်မူသော ပစ္စေကဗုဒ္ဓာအရှင်မြတ်။

အာပေါဓါတ် ၁၂-ပါး။ ။ မူလပဏ္ဏာသ။ ပါ။ ၁၉၇ ။ ဋ္ဌ။ ဒု-အုပ် ၃၇။ စိမ့်ဝင် စေးကပ် အ၀ိနိဗ္ဘောဂရုပ်တို့ကို ဖွဲ့စပ်ပေါင်းစည်းတတ်ခြင်း သဘောရှိသော (သတ္တ၀ါတို့သန္တန်၌ ငါ့ဟာ ငါ့ဥစ္စာဟု စွဲလမ်းတတ်သော) ၀တ္ထုအရည်ဓါတ် ၁၂-ပါးဟူလို။
(၁) ပိတ္တံ- သည်းခြေ၊
(၂) သေမှံ- သလိပ်၊
(၃) ပုဗ္ဗော- ပြည်၊
(၄) လောဟိတံ- သွေး၊
(၅) သေဒေါ- ချွေး၊
(၆) မေဒေါ- အဆီခဲ၊
(၇) အဿု- မျက်ရည်၊
(၈) ၀သာ- ဆြီကည်၊
(၉) ခေဠော- တံတွေး၊
(၁၀) သိင်္ဃာဏိကာ- နှပ်၊
(၁၁) လသိကာ- အစေး၊
(၁၂) မုတ္တံ- ကျင်ငယ်။

အာမိသမျိုး ၃-ပါး။ ။ မဂ်ဖိုလ်မရနိုင်အောင် ကပ်ငြိခြင်း ၃-ပါးဟူ၏။ ဥပရိပဏ္ဏာသ။ ပါ။ ၄၁။ ဋ္ဌ။ ၃၄-၌ အကျယ်ရှု။ (၁) ကာမာမိသ- ကာမဂုဏ် ၅-ပါး၌ ကပ်ငြိခြင်း၊
(၂) ၀ဋ္ဋမိသ- ၀ဋ် ၃-ပါး၌ ကပ်ငြိခြင်း၊
(၃) ကိလေသာမိသ- ကိလေသာ ဆယ်ပါး၌ ကပ်ငြိခြင်း။

အာမေဍိတ်များ၊ ဖြစ်ကြောင်းကား၊ ၉-ပါးကျမ်း၌လာ။ ။ အနက်ဒြပ်တစ်ခုတည်းကိုပင် နှစ်ကြိမ် သုံးကြိမ် ရွတ်ဆိုခြင်းကို ]အာမေဍိတ်}ခေါ်၏၊ ပုံ- မြွေကြီး မြွေကြီး စသည်မျိုး။ အဘိဓာနပ္ပဒီပိကာကျမ်း၌ကား ၎င်းင်းကိုးမျိုးကိုပြု၏။
(၁) ဘယေ- ကြောက်သောအခါမျိုး၊
(၂) ကောဓေ- စိတ်ဆိုးဒေါသဖြစ်သောအခါမျိုး၊
(၃) ပသံသာယံ-ချီးမွမ်းကောင်းချီးပေးသောအခါမျိုး၊
(၄) တုရိတေ- အဆောတလျင်ပြုသောအခါမျိုး၊
(၅) ကောတူဟလေ- အဆန်းအသစ်တွေ့သောအခါမျိုး၊
(၆) အစ္ဆရေ- အံ့သြသောအခါမျိုး၊
(၇) ဟာသေ- အားရ၀မ်းသာရွှင်လန်းသောအခါမျိုး၊
(၈) သောကေ- စိုးရိမ်ဝမ်းနည်းသောအခါမျိုး၊
(၉) ပသာဒေ- ကြည်ညိုလွန်းသောအခါမျိုး။

အာယတန ၁၂-ပါး။ ။ သဠာယတနသုံယုတ်။ ပါ။ ၂၅၁။ ဋ္ဌ။ ၆-တို့၌အကျယ်ရှုပါ။ သတ္တ၀ါတို့အား နှိပ်စက်တတ်ပုံကိုပြထား၏၊ အာရုံတရားတို့၏၊ သို့မဟုတ် ကမ္မဘ၀၏ထွက်ဝင်သွားလာရာ နေအိမ်သဖွယ်ဖြစ်သောသဘော ၁၂-ပါး ဟူလို။
(၁) စက္ခာယတန- စက္ခု ပသာဒ ခေါ် မျက်စိအကြည်ဓါတ်၊
(၂) သောတာယတန- သောတပသာဒခေါ် နားအကြည်ဓါတ်၊
(၃) ဃာနယတန- ဃာနပသာဒခေါ် နှာခေါင်းအကြည်ဓါတ်၊
(၄) ဇိဝှါယတန- ဇိဝှာပသာဒ ခေါ် လျှာအကြည်ဓါတ်၊
(၅) ကာယာယတန- ကာယပသာဒခေါ် ကိုယ်အကြည်ဓါတ်၊
(၆) မနာယတန- စိတ် ၈၉-ခုဟုဆိုအပ်သော မနောအကြည်ဓါတ်၊
(၇) ရူပါယတန- အဆင်းအာရုံ၊
(၈) သဒ္ဒါယတန- အသံအာရုံ၊
(၉) ဂန္ဓာယတန- အနံ့အာရုံ၊
(၁၀) ရသာယတန- အရသာအာရုံ၊
(၁၁) ဖောဋ္ဌဗ္ဗာ ယတန- ပထ၀ီ တေဇော ၀ါယောဟုဆိုအပ်သော ဓါတ်သုံးပါး အပေါင်းအတွေ့အာရုံ၊
(၁၂) ဓမ္မာယတန- စေတသိက် ၅၂-ပါး, သုခုမရုပ်၁၆-ပါး, နိဗ္ဗာန်, ပညတ်ဟုဆိုအပ်သော ဓမ္မာရုံ။

အာရက္ခ သမ္ပဒါတရား ၅-ပါး။ ။ တိုးတက်ခိုင်မြဲရေးအတွက် မိမိတို့ပစ္စည်းအရပ်ရပ်ကို စောင့်ရှောက်မှုတရားငါးပါးဟူ၏။
(၁) ရာဇ ဘယ အာရက္ခ- မင်းပြစ် မင်းဘေးနှင့် ရုံးပင် ကန္နားရှောင်ရှားမှု။
(၂) စောရ ဘယ အာရက္ခ- သူခိုး ဓါးပြဘေးမှ လုံခြုံရေးအတွက် စောင့်ရှောက်တတ်မှု။
(၃) အဂ္ဂိ ဘယ အာရက္ခ- မီးဘေးမှကင်းဝေးအောင် ရှောင်ရှားတားဆီးတတ်မှု။
(၄) ဥဒကဘယ အာရက္ခ- ရေးဘေးမှကင်းဝေးအောင် တားတတ်ရှောင်တတ်မှု။
(၅) အပ္ပိယ ဒါယာဒ ဘယ အာရက္ခ- သားဆိုး သမီးဆိုး အမွေခံဆိုးမဖြစ်ရအောင်
လိမ္မာစေမှုကြောင့်ကြ ပြုကာ စောင့်ရှောက်စေခြင်း။

အာရုံ ၅-ပါး ကာမဂုဏ်တရား။ ။ ၎င်းင်းသရုပ် (ကာမဂုဏ် ၅-ပါး)၌ ပြမည်။

အာရုံ ၆-ပါး။ ။ မျက်စိ နား နှာ စသော တံခါးခြောက်ပေါက်မှ ၀င်လာသောအရာ ၆-ပါးဟူ၏။
(၁) ရူပါရုံ-အဆင်း၊
(၂) သဒ္ဒါရုံ- အသံ၊
(၃) ဂန္ဓာရုံ- အနံ့၊
(၄) ရသာရုံ- အရသာ၊
(၅) ဖေါဋ္ဌဗ္ဗာရုံ- အတွေ့အထိ၊
(၆) ဓမ္မာရုံ- ပသာဒရုပ် ၅-ပါး သုခုမရုပ် သောဠသ စိတ်တစ်ခု ယုတ်ကိုးဆယ်, စေတသိက် ၅၂, နိဗ္ဗာန်, ပညတ်။

အာရှတိုက် တိုင်းပြည်နိုင်ငံများ ပြည်နိုင်ငံများ။ ။ ၁၃၇၁-ခု၊ ၂၀၀၉-ခု။
က။ ။ အရှေ့အာရှ။
(၁) တရုတ်ပြည်၊ (၂) ဟောင်ကောင်း(တရုပ်အထူးအုပ်ချုပ်ခွင့်ဒေသ)၊ (၃) တိဘက် (တရုပ်)၊
(၄) မကာအို(တရုပ်အထူးအုပ်ချုပ်ခွင့်ဒေသ)၊ (၅) ဂျပန်၊ (၆) မြောက်ကိုရီးယား၊
(၇) တောင်ကိုရီးယား၊ (၈) မွန်ဂိုးလီးယား၊ (၉) တိုင်ဝမ်။
ခ။ ။ မြောက်အာရှ။ (၁) ရုရှ ဖက်ဒရေးရှင်း။
ဂ။ ။ အရှေ့တောင်အာရှ။
(၁) ဘရူနိုင်းလ် ဒါရူဆလမ်၊ (၂) ကမ္ဘောဒီးယား၊ (၃) အင်ဒိုနီးရှား၊ (၄) လာအို၊
(၅) မလေးရှား၊ (၆) မြန်မာ၊ (၇) ဖီလစ်ပိုင်၊ (၈) စင်္ကာပူ၊
(၉) ထိုင်း (ယိုးဒယား)၊ (၁၀) အရှေ့တီမော၊ (၁၁) ဗီယက်နမ်။
မှတ်ချက်။ တီမောမှလွဲ၍ ကျန် ၁၀-နိုင်ငံ မှာ အာဆီယမ် (ASEAN) အဖွဲ့ဝင်နိုင်ငံများဖြစ်သည်။
http://en.wikipedia.org/wiki/ASEAN
ဃ။ ။ တောင်အာရှ။ (၁) အာဖဂန် နစ္စတန်၊ (၂) ဘင်္ဂလားဒေ့(ရှ်)၊ (၃) ဘူတန်၊ (၄) အိန်္ဒိယ၊
(၅) မောဒိုက်ဗ်စ် ၊ (၆) နီပေါ၊ (၇) ပါကစ္စတန်၊ (၈) သီရိလင်္ကာ။
င။ ။ အနောက်အာရှ ။
(၁) အာမေးနီးယား၊ (၂) အဇာဘိုင်ဂျန်း၊ (၃) ဆိုင်းပရတ်၊ (၄) ဂျော်ဂျီယာ၊ (၅) ဘာရိန်း၊
(၆) အီရတ်၊ (၇) ပါရှား (အီရန်)၊ (၈) အစ်္စရေး၊ (၉) ဂျော်ဒန်၊ (၁၀) ကူဝိတ်၊
(၁၁) လက်ဘီနွန်၊ (၁၂) အိုမန်၊ (၁၃) ပါလက်စတိုင်း၊ (၁၄) ကာတာ၊ (၁၅) ရီမင်။
(၁၆) ဆော်ဒီအာရေဗျ၊ (၁၇) ဆီးရီးယား၊ (၁၈) တပ်ကီ (တူရကီ)၊ (၁၉) အာရပ်စော်ဘွားများနိုင်ငံ၊
(၅ မှ ၁၉ နိုင်ငံများသည် အရှေ့အလယ်ပိုင်း Middle East နိုင်ငံများတွင်ပါဝင်သည်)
http://www.mideastweb.org/countries.htm
စ။ ။ အလယ်အာရှ။ (၁)ကယ်ဇာစတန်၊ (၂) ကရယ်ဂစ်စတန်၊ (၃) တာဂျီကီစတန်း၊
(၄) တတ်ခ်မင်နစ်စတန်း၊ (၅) ဥဘက်ခစ်စတန်း၊
http://en.wikipedia.org/wiki/Asia
, http://lib.utexas.edu/maps/asia.html


အာလယတရား ၂-ပါး။ ။ (၁) ကာမာလယ- အာရုံငါးပါး ကာမဂုဏ်တရားကိုခေါ်သည်၊ (၂) တဏှာလယ-ထိုအာရုံငါးပါး ကာမဂုဏ်တရားကို မှီဝဲသုံးဆောင်တတ်သော တဏှာလောဘကို ဆိုသည်။

အာလိန် ၅-ဆင့်။ ။ သဂါထာဝဂ္ဂသံယုတ်။ ပါ။ ၂၁၈။ ၎င်းင်။ ဋ္ဌ။ ၃၁၀။ ဓမ္မပဒ။ ဋ္ဌ။ ပ-အုပ်။ ၁၇၇-တို့၌အကျယ်ရှုပါ။ မရိုးစည်လုံးသဏ္ဍာန်ကဲ့သို့ အလယ်ပူ အထက်ရှူးနေသော မြင်းမိုရ်တောင်ကြီး၌ အပြင်ဆင်ဝင်တောင်ခါးပန်းစွန်း ငါးဆင့်ရှိကုန်၏၊ ၎င်းင်းကိုပင် အာလိန်ငါးဆင့်ဟု ခေါ်ဆိုသည်မှတ်။ ထိုအာလိန်ငါးဆင့်တို့သည် တစ်ဆင့်တစ်ဆင့်၌ အထု၏လည်းကောင်း၊ အပြင်၏လည်းကောင်း အတိုင်းအရှည်ပမာဏအားဖြင့်ယူဇနာငါးထောင်စီ အသီးသီးရှိကုန်၏။
မြင်းမိုရ်တောင်၏ ရေပေါ် ယူဇနာရှစ်သောင်းလေးထောင်တွင် အောက်ထက်ဝက်ဖြစ်သော ယူဇနာ
လေးသောင်းနှစ်ထောင်ကို ငါးစုပြုသော် အောက်ဆုံးအစုသည် ပဌမအာလိန်မည်၏။
(၁) ပဌမအာလိန်သည် ရေ အထက်ပေါ်နေသည်ကား ထက်ဝက်, ရေအောက်နစ်နေသည်ကား ထက်ဝက်ဖြစ်၏၊ ထိုပဌမအာလိန်၌ နဂါးမင်းတို့နေ၏။
(၂) ထိုအထက် ဒုတိယ အာလိန်ကား လက်ပံပင်တောကြီးအတိဖြစ်၍ ဂဠုန်မင်းတို့ နေကြကုန်၏။
(၃) ထို့အထက် တတိယအာလိန်ကား ဂုမ္ဘဏ်တို့ နေရာဖြစ်၏။
(၄) ထို့အထက် စတုတ္ထအာလိန်ကား ဘီလူးရက္ခိုသ်တို့၏ နေရာဖြစ်၏။
(၅) ထို့အထက် ပဉ္စမအာလိန်ကား မြင်းမိုရ်တောင်၏ခါး ယုဂန္ဓိုရ်တောင်၏ထိပ်နှင့် ညီမျှ၍ "ဓတရဋ္ဌ, ၀ိရူဠက, ၀ိရူပက္ခ, ကုဝေရ" အမည်ရသော နတ်မင်းကြီးလေးပါးတို့၏ နေရာ စတုမဟာရာဇ်နတ်ပြည်ပင်ဖြစ်လေ၏။
မှတ်ချက်။ ။ လောက၌ ယူဇနပေါင်း (၈၄၀၀၀) မြင့်မားသော မေရုရာဇာ မြင်းမိုရ်တောင်ကားအမှန်ရှိ၏။ သို့သော် လူသားများကား အနန္တတန်ခိုးရှင် သဗ္ဗညု မြတ်စွာဘုရားသခင်နှင့် စကြာရတနာမင်းမြတ်တို့- ပွင့်ထွန်းပေါ်ပေါက်လာသော ကာလမျိုး၌သာ တွေ့မြင်ကြရကြောင်း၊ ရှေးသူဟောင်း ပဋကပညာကျော် ဆရာတော်ကြီးများ ပြောကြားတော်မူကြသည်ကို မှတ်သားရဖူး၏။
ကျမ်းစာသာဓကများကိုတော့ မသိရဖူးချေ။

အာဝေဏိက ဂုဏ်တော် ၁၈-ပါး။ ။ အဘိဓမ္မာ ၀ိဘင်္ဂ မူလဋီကာ စာမျက်နှာ- ၂။ ဘုရားရှင်အတွက် သက်သက်သီးခြား ဂုဏ်တော် ၁၈-ပါး။
(၁) အတီတံသေ ဗုဒ္ဓဿ ဘဂ၀တော အပ္ပဋိဟတ ဥာဏံ- အတိတ်အဖို့၌ ဥာဏ်တော်၏ အပိတ် အပင်အတားအဆီးမရှိခြင်း၊
(၂) အနာဂတံသေ- အနာဂတ်အဖို့၌လည်း ၎င်းင်းအတိုင်းပင်၊
(၃) ပစ္စုပ္ပန္နံသေ-ပစ္စုပ္ပန်၌လည်း ၎င်းင်းအတိုင်းပင်၊
(၄) သဗ္ဗံ ကာယကမ္မံ ဥာဏ ပုဗ္ဗင်္ဂမံ၊ ဥာဏာနုပရိဝတ္တံ- ကာယကံမှု အလုံးစုံ၌ ဥာဏ်တော်သာလျှင် ရှေ့သွားရှိခြင်း၊ ဥာဏ်တော်သို့သာ အစဉ်လိုက်ခြင်း၊
(၅) သဗ္ဗံ ၀စီကမ္မံ-၀စီကံမှုတို့၌လည်း ၎င်းင်းအတိုင်းပင်၊
(၆) သဗ္ဗံ မနောကမ္မံ- မနောကံအမှုတို့၌လည်း ၎င်းင်းအတိုင်းပင်၊
(၇) နတ္ထိ ဆန္ဒဿ ဟာနိ- အလိုဆန္ဒတော်၏ ယုတ်လျော့အားနည်းမှုမရှိခြင်း၊
(၈) နတ္ထိ ၀ီရိယဿ ဟာနိ-အားထုတ်မှုဝီရိယ၏လည်း ၎င်းင်းအတိုင်းပင်၊
(၉) နတ္ထိ သမာဓိဿ ဟာနိ- သမာဓိတော်၏လည်း ၎င်းင်းအတိုင်းပင်၊
(၁၀) နတ္ထိ ပညာယ ဟာနိ- ပညာတော်အရာ၌လည်း ၎င်းင်းအတိုင်းပင်၊
(၁၁) နတ္ထိဓမ္မ ဒေသနာယ ဟာနိ-တရားဟောရာ၌လည်း ၎င်းင်းအတိုင်းပင်၊
(၁၂) နတ္ထိ ၀ိမုတ္တိယာ ဟာနိ- ၀ိမုတ္တိတရား အဖို့၌လည်း ၎င်းင်းအတိုင်းပင်၊
(၁၃) နတ္ထိဒ၀ါ- ပြက်ရယ်ပြုမှု မြူးထူးမှု မရှိခြင်း၊
(၁၄) နတ္ထိ ရ၀ါ- ချွတ် ချော်တိမ်းပါးမှုမရှိခြင်း၊
(၁၅) နတ္ထိ အဖုဋံ- ဥာဏ်တော်နှင့် မတွေ့ထိသော အရာဟူ၍မရှိခြင်း၊
(၁၆) နတ္ထိ ဝေဂါယိတတ္တံ- အဆောတလျင်ပြုရသည်၏အဖြစ်မျိုး မရှိခြင်း၊
(၁၇) နတ္ထိ အဗျာဝဋမနော- ကြောင့်ကြမဲ့စိတ်မျိုး မရှိခြင်း၊
(၁၈) နတ္ထိ အပ္ပဋိသင်္ခါနုပေက္ခာ- ပညာÓဏ် မဆင်မခြင် ရှုလေ့မရှိခြင်း။

အာဝေဏိက ဒုက္ခ ၅-ပါး။ ။ သဠာယတနသံယုတ်။ ပါ။ ၄၃၆- ၄၃၇။ ဋ္ဌ။ ၁၂၅-၌ အကျယ်ရှုပါ။ မိန်းမများအတွက်သီးခြားခံယူရသော ဒုက္ခငါးပါး။
(၁) အရွယ်ရောက်လျှင် ရာသီဥတုသွေး တစ်လတစ်ကြိမ် သွန်ရခြင်း၊
(၂) လင်၏နောက်သို့ လိုက်ပါသွားရခြင်း၊
(၃) လင်၏အလုပ်အကျွေးအဖြစ် ပြုလုပ်ရခြင်း၊
(၄) ကိုယ်ဝန်ဆောင်ရခြင်း၊
(၅) သားဖွားရခြင်း။

အာဝေဏိက၊ ပို့ကြမေတ္တာ၊ ၇-ဖြာ၊ အင်္ဂါအဘယ်နည်း။ ။ သီးခြားကန့်သတ်၍ ပို့သပွားများရသော (သြဓိဿမေတ္တာ ၇-ပါး) ကိုပင် အာဝေဏိကမေတ္တာဟု ခေါ်ကြသည်၊ အဖြေ ၎င်းင်း၌ရှုပါကုန်။ မှတ်ချက်။ ။ အချို့ ဆိုင်းနောက်ထနှင့် သဘင်သည်တို့ကား မပီမသ "အာဝေဓိက မေတ္တာ"ဟု ခေါ်နေကြကုန်၏။ ပြင်ပေးကြပါ။

အာသယတရား ၄-ပါး။ ။ စိတ်တို့၏မှီတည်ရာ သို့မဟုတ် သတ္တ၀ါတို့၏မှီတည်ရာ လေးပါး-ဟူလို၊ သာရတ္ထဒီပနီဋီကာ။
(၁) သဿတ ဒိဋ္ဌိ- သတ္တ၀ါ သင်္ခါရတို့၏ မြဲ၏ဟူသောအယူ၊
(၂) ဥစ္ဆေဒ ဒိဋ္ဌိ- သေပြီးနောက် သတ္တ၀ါသင်္ခါရတို့ ပြတ်၏ဟူသောအယူ၊
(၃) သစ္စာနုလောမိကဥာဏ်- မဂ္ဂသစ္စာအားဖြင့်လည်းကောင်း၊ပရမတ္ထသစ္စာအားဖြင့်လည်းကောင်း ရှိ၏ဟုလျောက်ပတ်
လျော်ကန်သော ဥာဏ်အမြင်၊
(၄) ကမ္မဿကတာ ဥာဏ်- ကုသိုလ်ကံသည် ချမ်းသာပေးသော မိမိဥစ္စာဖြစ်၍ ပြုရမည့်ကံတည်း၊ အကုသိုလ်ကံသည် ဒုက္ခပေးသော မိမိဥစ္စာဖြစ်၍ မပြုရမည့်ကံတည်းဟု ကံသာလျှင် မှီရာတည်ရာရှိသည်အဖြစ်ကို သိတတ်သော ဥာဏ်အမြင်တည်း။

အာသ၀တရား ၄-ပါး။ ။ ဘုံအားဖြင့် ဘ၀ဂ်ç ဓမ္မအားဖြင့် ဂေါတြဘုတိုင်အောင်ယိုစီးနှိပ်စက်တတ်သောတရားများ။ (၁) ကာမာသ၀- ကာမ ၁၁-ဘုံ၌ တပ်နှစ်သက်တတ်သော လောဘတဏှာ၊
(၂) ဘ၀ါသ၀-ရူပ ၁၆-ဘုံ, အရူပ ၄-ဘုံ၌ တပ်မက်သော လောဘတဏှာ၊
(၃) ဒိဋ္ဌာသ၀- မှားသော မိစ္ဆာအယူ ဒိဋ္ဌိစေတသိက်၊
(၄) အ၀ိဇ္ဇာသ၀- သစ္စာဥာဏ်အမြင်ကို ဖုံးလွှမ်းပိတ်ဆီးတတ်သော မောဟ။

အာဟာရ ၄-ပါး။ ။ မိမိဆိုင်ရာအကျိုးတရားများကို အရှည်ခံ့အောင်ပို့ဆောင်ထောက်ပံ
့စေတတ်သော တရားသဘော၎-ပါး။
(၁) ကဗဠီကာရာဟာရ- စားအပ်သောအစားအစာဟူသမျှ၊
(၂) ဖဿာဟာရ- အတွေ့အထိဖဿသဘော၊
(၃) စေတနာဟာရ- စေ့စော်မှု စေတနာသဘော၊
(၄) ၀ိညာဏာဟာရ- ၀ိပါက်ဝိညာဏ် ဖြစ်သောတရားစု။

အာဠာဝကဘီလူး၏ လက်နက်ကြီး ၉-ပါး။ ။ အာဠာဝက သံယုတ်မှ။
(၁) သုံးယူဇနာမြင့်သော တောင်ထွတ်ကိုဖြိုဖျက်နိုင်သော မုန်တိုင်းလက်နက်၊
(၂) သစ်ပင် တောင်ကမ်းတို့ကို နှစ်လွှမ်းနိုင်သော မိုးရေလက်နက်၊
(၃) တောင်ထုကြီးကို ဖြိုခွဲကြေမွနိုင်သော ကျောက်စစ်မိုးလက်နက်၊
(၄) သင်ဓုန်း လှံကန် သန်လျက်မိုးလက်နက်၊
(၅) ရဲရဲညီးသော မီးကျီးမိုး မီးတောက်မီးလျှံ ဘွဲ့ဖြူလက်နက်၊
(၆) ပြာပူမိုးလက်နက်၊
(၇) သလဲမိုး လက်နက်၊
(၈) ညွန်ပျောင်းမိုး လက်နက်၊
(၉) အင်္ဂါ ၄-ပါးရှိသော အမိုက်တိုက်လက်နက်။

အားမျိုး ၈-ပါး။ ။ အဋ္ဌဂုင်္တ္တရ ပါဠိတော်။ ၅၈။ ၎င်းင်း အဋ္ဌကထာ။ ၂၂၃-၌ အကျယ်ရှုပါ။
(၁) ရုဏ္ဏဗလာ ဒါရကာ-သူငယ်တို့အားကား ငိုခြင်း၊
(၂) ကောဓဗလာ မာတုဂါမာ- မိန်းမတို့အားကား အမျက်ထွက်၊ စိတ်ဆိုးငိုတတ်ခြင်း၊
(၃) အာဝုဓဗလာ စောရာ- ခိုးသူ ဓါးပြတို့အားကား လက်နက်၊
(၄) ဣဿရိယဗလာ ရာဇာနော- ဘုရင်မင်းတို့အားကား အစိုးရခြင်း၊
(၅) ဥဇ္ဈတ္တိဗလာ ဗာလာ- သူမိုက်တို့အားကား မြော်မြင်လွတ်ကင်း ကဲ့ရဲ့ခြင်း၊
(၆) နဇ္ဈတ္တိဗလာ ပဏ္ဍိတာ- ပညာရှိတို့အားကား မြော်မြင်ရှုစားသတိထားခြင်း၊
(၇) သဋိသင်္ခါနဗလာ ဗဟုဿုတာ- အကြားအမြင်များသော ပုဂ္ဂိုလ်တို့၏ အင်အားကား အရာရာ၌ကောင်းစွာဆင်ခြင်ခြင်း၊
(၈) ခန္တီဗလာ သမဏ ဗြာဟ္မဏ- ရသေ့ရဟန်းတို့၏အင်အားကား သည်းခံခြင်း။
မှတ်ချက်။ ။ ပါဠိတော်၌ အမြတ်ဆုံးသောသည်းခံခြင်း ခန္တီအားသည် ရှစ်ခုမြောက်ဖြစ်၏၊ ၎င်းင်းကိုရည်၍ပါရမီခန်း၌ "ပရမံ တပေါ်၊ ခန္တီကျော်ဟု၊ သူတော်အကျင့်၊ အားရှစ်ဆင့်"ဟု စပ်ဆိုထားလေပြီ။

အားတော် ၁၀-ပါး၊ မြတ်ဘုရား၊ ကိုယ်အား ဥာဏ်အားရှိ။ ။ မြတ်စွာဘုရားသခင်၏ ဥာဏ်တော်အား ဆယ်ပါး၊ ကိုယ်တော်အား ဆယ်ပါးဟူလို၊ ဥာဏ်တော်အား ဆယ်ပါးကား -
(၁) ဌာနာ ဌာန ကောသလ္လဥာဏ်- အရာဟုတ်သည် မဟုတ်သည်တို့ကို သိတော်မူခြင်း။
(၂) ကမ္မ၀ိပါက ဥာဏ်- ကံ ကံ၏အကျိုးကိုသိတော်မူခြင်း။
(၃) သဗ္ဗတ္ထဂါမိနီ ပဋိပဒါဥာဏ်- အလုံးစုံကုန်သောဘ၀တို့သို့ရောက်ခြင်းအကြောင်း၌ သိတော်မူခြင်း။
(၄) အနေကဓါတု နာနာဓါတု ဥာဏ်- များသော လောကဓါတ် အထူးထူးသော လောကဓါတ်
တို့ကို သိတော်မူခြင်း။
(၅) နာနာ ဓိမုတ္တိ ဥာဏ်- အထူးထူးသောအလိုတို့ကို သိတော်မူခြင်း။
(၆) ဣန္ဒြိယ ပရောပရိယတ္တိ ဥာဏ်- ဣနြေ္ဒ နုရင့်ခြင်း၌သိတော်မူခြင်း။
(၇) ဈာန ၀ိမောက္ခာဒိ ဥာဏ်- ဈာန် ၀ိမောက္ခစသည်တို့၌ သိတော်မူခြင်း။
(၈) ပုဗ္ဗေ နိဝါသ ဥာဏ်- ရှေးကနေခဲ့ဖူးသော ခန္ဓာအစဉ်ကို သိတော်မူခြင်း။
(၉) ဒိဗ္ဗစက္ခု ဥာဏ်- အပိတ်အပင်အတားအဆီးမရှိ နတ်မျက်စိကဲ့သို့ ပကတိ သိမြင်တော်မူခြင်း။
(၁၀) အာသ၀က္ခယ ဥာဏ်- အာသဝေါတရားတို့၏ကုန်ရာ နိဗ္ဗာန်ကိုသိတော်မူခြင်း။
ဤကား ဥာဏ်တော်အားဆယ်ပါးတည်း။ (ဥာဏ၀ိဘင်း ပါဠိတော်နှင့် အဋ္ဌကထာမှာ အကျယ်ရှု။)
ကိုယ်တော်အား ဆယ်ပါး။ မြတ်စွာဘုရားသခင်၏ ပကတိသော အားတော်မြတ်သည်
"ဆဒ္ဒန်ဆင်မင်း" ဆယ်စီးအားနှင့်အညီအမျှ ရှိတော်မူသတတ်၊ ၎င်းင်းကိုပင် အားတော်ဆယ်ပါးခေါ်၏၊ ထို့ကြောင့် ဒသဗလော- ကိုယ်တော်အားဆယ်ပါးနှင့် ပြည့်စုံတော်မူသော မြတ်စွာဘုရားဟုဘာသာပြန်ဆိုကြလေပြီ။ မှန်၏၊ (သမ္မာသမ္ဗုဒ္ဓေါ ပန ဒသန္နံ ဆဒ္ဒန္တာနံ ဗလံ ဓါရေတိ၊ တေနေ၀ ဘဂ၀ါ ကာဠာဝကဟတ္ထိ ဂဏနာယ ကောဋိသဟဿဗလံ ဓါရေတိ၊ ပုရိသ ဂဏနာယ ဒသန္နံ ပုရိသ ကောဋိသဟဿာနံ ဗလံ) မြတ်စွာဘုရားသည် ဆဒ္ဒန်ဆယ်စီးအားကို ဆောင်နိုင်၏၊ ထို့ကြောင့် ယခုအခါ မြန်မာပြည် စသည်၌အသုံးပြုနေသော "ဆင်မည်းခေါ်" အော်မြည်တတ်သော "ကာဠာဝက"ဆင်ပေါင်း ကုဋေတစ်ထောင်အား၊ ဗိုလ်ခြေယောက်ျား ကုဋေတစ်သောင်းအားကိုဆောင်နိုင်သောအားတော်မြတ် ရှိသည်ဟူ၏။ (အဘိဓါန်ဋီကာမှ။)